Vertebradas Artes Escénicas

A compañía Vertebradas Artes Escénicas xurdiu do Obradoiro de Teatro Inclusivo que dirixo e creou en 2015 co obxectivo de afondar no método do teatro vivencial, experimentando con técnicas interpretativas e de creación colectiva. A linguaxe escénica dos nosos espectáculos é o reflexo desta investigación e o froito de case 20 anos de traballo ininterrompido con persoas con discapacidade intelectual e psíquica. Unha linguaxe interdisciplinar onde cada intérprete pode expresarse en función das súas capacidades, calidade inherente ao termo “inclusión”, que enriquece significativamente a expresión grupal. Unha pedra angular dos valores da compañía, a igualdade e a inclusión sustentan todas as nosas producións nas distintas áreas profesionais. A calidade creativa e escénica destas producións é un reflexo da diversidade do grupo e dos beneficios da diferenza.